Астанада ер адамды футбол қақпасы басып мерт болды

Астанада футбол алаңында қайғылы жағдай орын алды. Ойын кезінде футбол қақпасы ер адамды басып қалып, ол оқиға орнында қаза тапты, деп хабарлайды POLITICO.KZ.

Астана қалалық полиция департаментінің мәліметінше, қайтыс болған азамат футбол алаңында қақпаның үстіне шығып, қолымен асылып тұрған. Сол сәтте ауыр металл конструкциясы аударылып, оны басып қалған.

Қазір полиция бұл оқиғаның нақты мән-жайын анықтау үшін тергеу жұмыстарын жүргізуде. Алдын ала болжам бойынша, бұл – абайсызда болған қайғылы жағдай.

Оқиға бейнебақылау камераларына түсіп қалған. Бейресми мәліметтерге сүйенсек, қайғылы жағдай "Достық Арена" спорт алаңында орын алған.

Бұл оқиға спорт алаңдарындағы қауіпсіздік мәселесін тағы да көтерді. Сарапшылардың айтуынша, мұндай жағдайлар жабдықтардың техникалық жағдайы қатаң бақылауда болмаған кезде жиі кездеседі.

Қалалық әкімдік пен спорт басқармасы оқиғаға байланысты әзірге түсініктеме берген жоқ. Алайда сарапшылар спорт алаңдарында қақпалардың бекітілуі мен қауіпсіздік талаптарын күшейту қажеттігін айтуда.