“Дәрігер де, жедел жәрдем де жоқ”: Атырауда ауыл халқы әкімнің қызметтен кетуін талап етуде

Атырау облысы Құрманғазы ауданына қарасты Күдряшов ауылының тұрғындары жергілікті әкімнің жұмысына наразылық білдіріп, оны қызметінен босатуды талап етуде, деп хабарлайды Politico.kz.

Екі мыңнан астам халқы бар ауыл тұрғындарының айтуынша, елді мекендегі әлеуметтік мәселелер жылдар бойы шешілмей келеді.

Тұрғындардың сөзінше, ауылдағы ең өзекті мәселенің бірі – медициналық қызметтің нашарлығы. Қазіргі уақытта Күдряшов ауылында тұрақты жұмыс істейтін білікті дәрігер жоқ. Бұдан бөлек, ауылға қызмет көрсетіп келген жалғыз жедел жәрдем көлігі де басқа елді мекенге ауыстырылған. Соның салдарынан тұрғындар шұғыл медициналық көмекке дер кезінде қол жеткізе алмай отырғандарын айтады.

Ауыл халқының мәліметінше, шамамен екі апта бұрын олар ауыл әкімінің қызметіне қатысты ұжымдық арыз әзірлеп, оны аудандық және облыстық деңгейдегі құзырлы мемлекеттік органдарға жолдаған. Құжатта әкімнің екі жылдық қызметі барысында ауылдың әлеуметтік-экономикалық жағдайын жақсартуға бағытталған нақты жұмыстардың аз болғаны көрсетілген.

Тұрғындардың пікірінше, жолдардың сапасы, инфрақұрылым, медициналық қамтамасыз ету және өзге де әлеуметтік мәселелер әлі күнге дейін шешімін таппаған. Осыған байланысты олар жергілікті биліктен ауыл әкімінің қызметіне жан-жақты баға беріп, кадрлық шешім қабылдауды сұрап отыр.

«Біз бірнеше рет мәселе көтердік. Бірақ ауылдағы түйткілдер сол күйі қалып отыр. Дәрігер жоқ, жедел жәрдем жоқ. Халықтың талабын еститін уақыт келді», – дейді ауыл тұрғындары.

Алайда әзірге Атырау облысының әкімдігі мен басқа да мемлекеттік мекемелер бұл мәселеге қатысты ресми түсініктеме берген жоқ. Сондықтан тұрғындардың талабы бойынша қандай шешім қабылданатыны әзірге белгісіз.