Еліміздің бірнеше өңіріне қауіп төніп тұр

Республиканың бірнеше өңірінде көктемгі еріген қар мен жауын-шашын салдарынан су тасқыны қаупі күшейіп отыр, деп хабарлайды POLITICO.KZ.

Қазгидрометтің хабарлауынша, 26-27 наурыз аралығында Қостанай облысында Шортанды өзенінде су деңгейі еріген қар суынан көтерілуі мүмкін, бұл жақын маңдағы елді мекендерге қауіп төндіруі ықтимал. Сол сияқты, Солтүстік Қазақстан облысында да қар еріп, автожолдар мен елді мекендерді су басу қаупі бар. Синоптиктер Үлкен Тарангүл көлінде де су деңгейінің көтерілуін болжауда.

Алматы және Алматы облысындағы таулы, тау бөктеріндегі аудандарда да жағдай күрделі. Жауын-шашын әсерінен Үлкен және Кіші Алматы өзендерінің бассейндерінде қар көшкіні жүруі мүмкін, сондықтан мамандар тауға шығудан уақытша бас тартуға кеңес беруде. Сонымен қатар, бұл аймақтарда су деңгейінің көтерілуі таяу маңдағы елді мекендерге қауіп төндіреді.

Ақмола мен Шығыс Қазақстан облыстарында да 25-27 наурыз аралығында су деңгейі көтерілу қаупі бар. Мұз кептелістерінің салдарынан өзендердің тасу ықтималдығы жоғары. Абай мен Жетісу облыстарында да жағдай осындай. Қазгидромет ел аумағындағы ауа райының құбылмалы болуына байланысты басқа өңірлерге де дабылды ескерту жариялап отыр.

Мамандар табиғи құбылыстарға мұқият болуға шақырып, алдын алу шараларын ескерусіз қалдырмауға кеңес береді. Су тасқыны қаупі бар өңір тұрғындары үшін бұл кезеңде сақтық – басты міндет.