Көшпенділер ойындарының экс-басшысы аса ірі көлемде пара алды деген күдікке ілінді

Дүниежүзілік көшпенділер ойындары дирекциясының бұрынғы басшысы Наиль Нұров аса ірі көлемде пара алды деген күдікпен қамауға алынды, деп хабарлайды Politico.kz сайты “Kozachkov Offside” Telegram каналына сілтемемен.

Мәліметтерге сәйкес, экс-шенеунік қазіргі уақытта Астанадағы тергеу изоляторында отыр. Тергеу органдары оны сыбайлас жемқорлық қылмысына қатысы бар деп күдіктеуде.

59 жастағы Наиль Нұров спорттық нысандар мен ірі халықаралық іс-шараларды ұйымдастыру саласында ұзақ жылдық тәжірибеге ие. Ол бұған дейін 2011 жылғы Азия ойындары мен 2017 жылғы Дүниежүзілік қысқы Универсиаданы өткізуге жауапты лауазымдарда қызмет атқарған. Сондай-ақ 2024 жылғы Дүниежүзілік көшпенділер ойындарын ұйымдастыру дирекциясын басқарған.

Тергеу нұсқасы бойынша, Нұров құны 500 миллион теңгеден асатын этноауыл құрылысын жүзеге асыру жөнінде келісім жасап, кейін мердігерден жоба құнының 10 пайызын «сыйақы» ретінде талап еткен.

Құқық қорғау органдарының мәліметінше, күдіктіге қаражат қолма-қол берілген. Сонымен қатар мердігер оның жеке пайдалануына арналған металл беседканы орнату шығындарын да өтеген.

Тергеу барысында жиналған дәлелдерге сәйкес, бұрынғы дирекция басшысы жалпы сомасы кемінде 40 миллион теңге көлемінде заңсыз сыйақы алған болуы мүмкін.

Соттың санкциясымен күдікті екі ай мерзімге қамауға алынды. Қазіргі уақытта іс бойынша тергеу амалдары жалғасуда.