Кремль ресейлік миллиардерлерді санкциядан құтқаруға тырысып жатыр

Ресей президенті Владимир Путинге қарсы санкциялардың жойылуы ел ішіндегі саяси-экономикалық себептермен байланысты, деп хабарлайды POLITICO.KZ The Spectator басылымына сілтеме жасап.

Мақала авторы, Еуропалық саясатты талдау орталығының сарапшысы Александр Коляндрдің жазуынша, санкцияны алып тастауға Мәскеудің бірнеше себебі бар.

Біріншіден, санкция тізіміне енген ресейлік миллиардерлердің мүддесі. Олардың қатарында тыңайтқыш өндіруші алпауыт компаниялардың бұрынғы иелері Андрей Мельниченко, Андрей Гурьев, Дмитрий Мазепин және Вячеслав Моше Кантор бар. Сондай-ақ, краб және минтай өнімдерін өндіруші кәсіпорындардың бұрынғы бақылаушысы Глеб Франк та санкцияға ілінген.

Олар өз акцияларын басқа тұлғаларға өткізіп, санкциядан аман қалуға тырысқанымен, бұл мәмілелердің кері қайтарылуы мүмкін деген пікір бар. Кремль бұл талаптарды азық-түлік қауіпсіздігін қамтамасыз ету деп көрсетіп отыр.

Екіншіден, Мәскеу ауыл шаруашылығы техникасы, тұқым, тыңайтқыш және ветеринарлық вакциналар импортына шектеуді алып тастауды қалайды. 2022 жылға дейін бұл саладағы импорт көлемі шамамен 2 миллиард фунт стерлингке жеткен.

Соңғы үш жылда импорт пен төлемге қатысты шектеулер Ресейде жұмыртқа, құс еті, сиыр еті және көкөніс бағасының күрт өсуіне себеп болды. Кремль импортты қалпына келтіру арқылы инфляцияны төмендетуді көздейді.

Алайда ең басты талап – Россельхозбанкке қатысты санкцияларды жою. Ресей бұл банктің SWIFT жүйесіне қайта қосылып, халықаралық төлемдер жүргізе алуын қалайды. Бұл тек ауыл шаруашылығы өнімдерінің экспортын емес, жалпы әлемдік қаржы жүйесіне қосылуды жеңілдетуге бағытталған.

АҚШ бұл талапты біржақты орындай алмайды. Сарапшылардың пікірінше, Кремль АҚШ-ты бүкіл Батыс әлеміне үстемдік етеді деп қабылдауы мүмкін.

Мәскеудің барлық талаптары орындалмасы анық, бірақ бұл Кремльдің ішінара келіссөзге дайын екенін көрсетеді. Сонымен қатар, бұл тізім Ресей ішінде келіссөз кезіндегі басым бағыттар бойынша тартыс бар екенін де аңғартады.