"Сатқындарға орын жоқ": Министр Ержан Сәденов Жамбыл облысында ұсталған полиция басшысы жайлы айтты

Ішкі істер министрі Ержан Сәденов жоғары лауазымды полиция қызметкерлеріне қатысты қозғалған қылмыстық іске пікір білдірді, деп хабарлайды POLITICO.KZ

Министрдің айтуынша, заң бұзушылықтар мен қылмыстар полицей мәртебесіне мүлде сәйкес келмейді.

«Өкінішке орай, мұндай жағдайлар орын алады. Ішкі істер органдары – үлкен мекеме, сондықтан мен тек статистикаға ғана сүйенгім келмейді, бірақ ол, әрине, жүргізілуі керек. Мен бірнеше рет айтқанымдай, құқық бұзушылықтар, соның ішінде қылмыстар, полиция қызметкерінің жоғары мәртебесімен мүлдем үйлеспейді. Полиция қызметкері халықты қорғауы керек. Мұндай жағдайлар сатқындықтың белгісі. Сатқындарға қатысты біздің сөзіміз қысқа: оларды заңға сәйкес анықтаймыз және біздің позициямыз қатаң және бірмағынады – біздің қатарда сатқындарға орын жоқ», – деді министр.

Әңгіме Жамбыл облысы полициясы бастығының бұрынғы орынбасары Жайдарбек Құттыбаев туралы болып отыр. Ол қызметінен бір күнде босатылып, кейін екі айға қамауға алынған еді.

ORDA.KZ мәліметінше, Құттыбаев кадрлық мәселелерге жауапты болған. Оған қатысты шағымдардан кейін тексеріс басталған. Ақпарат көздерінің айтуынша, жағдай қаратаулық жол полициясы инспекторы Дархан Уәлиевке қатысты оқиғадан басталған. Инспектор бірде жергілікті депутаттың ұлын тоқтатқан. Бірақ нақты қандай себеппен тоқтатқаны белгісіз. Кейін депутаттың ұлы полиция департаментіне шағымданған. Оқиға барысында парақорлық дерегі болуы мүмкін екені айтылуда.