Қасым-Жомарт Тоқаев жаңа тағайындалған елшілердің сенім грамоталарын қабылдады

Астанадағы «Ақордада» Қазақстан Президенті Қасым-Жомарт Тоқаев бірнеше елдің жаңа тағайындалған елшілерінен сенім грамоталарын қабылдады, деп хабарлайды Politico.kz.

Сенім грамоталарын Грекия Елшісі Антониа Кацуру және Португалия Елшісі Жозе де Каштру Атаиде Амарал тапсырды. Церемония барысында елшілер Қазақстан мен өз елдері арасындағы дипломатиялық, экономикалық және мәдени байланыстарды нығайтуға дайындықтарын білдірді.

Қасым-Жомарт Тоқаев өз сөзінде Қазақстанның сыртқы саясаты тек бейбітшілікке, халықаралық ынтымақтастыққа және достыққа негізделгенін атап өтті. Мемлекет басшысы елшілерге елдегі дипломатиялық миссияларын тиімді жүргізу үшін барлық жағдай жасалатынын, Президент әкімшілігі мен Сыртқы істер министрлігінің оларға толық қолдау көрсететінін растады.

Сонымен қатар, Қазақстан мен Грекия, Португалия арасындағы саяси диалогты, сауда-экономикалық және мәдени ынтымақтастықты одан әрі дамыту қажеттігі айтылды. Елшілер өз кезегінде Қазақстанмен арадағы өзара тиімді әріптестікті тереңдетуге ниет білдірді.

Салтанаттың соңында Қасым-Жомарт Тоқаев дипломаттарды Қазақстандағы миссияларының ресми басталуымен құттықтап, табыс тіледі.