Қазақстан 2027 жылғы таэквондодан әлем чемпионатын өткізу құқығына ие болды

Астанада 30 елден келген мыңнан астам спортшының басын қосқан Kazakhstan Open халықаралық турнирі сәтті аяқталып, нәтижесінде еліміз 2027 жылы таэквондодан әлем чемпионатын қабылдау құқығын жеңіп алды, деп хабарлайды Politico.kz.

Дүниежүзілік таэквондо федерациясы елордада ұйымдастырылған рейтингтік бәсекеге оң баға беріп, отандық спорттың халықаралық беделін арттырған бұл жетістікті ерекше атап өтті. Жарыс барысында онлайн-трансляциялар, баспасөз орталығы мен төрешілердің арнайы жабдықтары үзіліссіз жұмыс істеуі үшін Қазақтелеком АҚ бас техникалық серіктес ретінде нысанды сенімді әрі жоғары жылдамдықты ІТ-инфрақұрылыммен қамтамасыз еткен.

Компания мамандары спорт алаңында тәулік бойы кезекшілік атқарып, байланыс арналарының тұрақтылығын қадағалағандықтан, Қазақстан таэквондо федерациясы сапалы интернет желісі жарыстың жоғары деңгейде өтуіне үлкен септігін тигізгенін алға тартып, ұйымдастырушыларға арнайы алғыс білдірді.

«Осындай ауқымды турнирдің техникалық серіктесі болу – біз үшін үлкен мәртебе. Kazakhstan Open – бұл беделді халықаралық жарыс қана емес, сонымен қатар Қазақстанның жоғары технологиялық әлеуетін көрсетуге берілген мүмкіндік. Біз ұсынған инфрақұрылым барлық жүйенің мінсіз жұмыс істеуін қамтамасыз етіп, турнирдің табысты өтуіне ат салысқанымызға қуаныштымыз. Ал жарыс қорытындысы бойынша Қазақстанның 2027 жылғы таэквондодан әлем чемпионатын өткізу құқығына ие болуы – еліміздің әлемдік деңгейдегі ірі жарыстарды қабылдауға толық дайын екенін көрсетеді», – деді Қазақтелеком АҚ Корпоративтік бизнес дивизионының техникалық директоры Рүстем Әбеуов.

Алдағы уақытта да телекоммуникациялық компания елімізде өтетін ірі халықаралық спорттық іс-шараларды заманауи желілермен қамтамасыз етуді әрі қарай жалғастыратынын мәлімдеді.