Қазақстан мектептерінде вирусқа байланысты шектеулер енгізу мүмкін

Қазақстан мектептерінде метапневмовирусқа байланысты шектеулер енгізу мүмкіндігіне қатысты Білім министрі Ғани Бейсембаев түсініктеме берді, деп хабарлайды POLITICO.KZ.

"Еліміздің білім беру жүйесі кез келген сын-қатерлерге дайын екенін көрсетіп отыр. Бұл – пандемия кезіндегі жинақталған тәжірибе. Сондықтан барлық колледждер мен мектептер қажетті жабдықтармен толық қамтамасыз етілген. Бірақ бұл жағдайда Денсаулық сақтау министрлігінің шешімін күтуіміз керек. Егер шешім қабылданса, біз дайынбыз," – деді Бейсембаев үкімет отырысынан кейін.

Вице-премьер Тамара Дүйсенова өз кезегінде Денсаулық сақтау министрлігінің ВОЗ-ға сұрау жібергенін атап өтті.

"Олардың жауабында дүрбелең тудырудың қажеті жоқ делінген, өйткені бұл вирус ондаған жылдар бойы әлемнің көптеген елдерінде айналымда жүр. Алдын алу шараларын қолға алу маңызды. Бұл – қалыпты құбылыс. Біз бірге бұл кезеңнен өтуіміз керек," – деді Дүйсенова.

Естеріңізге сала кетейік, бұған дейін Президент метапневмовирусқа қатысты дүрбелең жасамауға шақырған болатын.