Қазақстан Президенті қайда отырады? Астана мен Алматыдағы резиденциялар

Қазақстанда мемлекет басшыларына арналған кемі оннан астам резиденция бар. Олардың бір бөлігі мемлекет меншігінде болса, кейбірі бұрын жекешелендірілген. Бірқатар нысандар мемлекетке қайтарылғанымен, толық заңдылығы туралы ақпарат ашық емес, деп хабарлайды POLITICO.KZ АЗАТТЫҚ РАДИОСЫНА сілтеме жасап.

АСТАНАДАҒЫ РЕЗИДЕНЦИЯЛАР

Астананың Күйгенжар ауылына жақын орналасқан бұрынғы президент Назарбаевтың екі саяжайының бірі мемлекетке қайтарылған. Екіншісінің иесі белгісіз. Кадастрда дерек жоқ, бірақ бұл үй 2022 жылы Назарбаевтың ұлы Бәйкеннің атына тіркелгені мәлім.

Қала маңындағы жасыл белдеудегі тағы бір алып резиденция 2021 жылы орман ішінен бой көтерген. Құрылысқа қанша қаражат жұмсалғаны айтылмаған. Бұл аумақ президенттің іс басқармасына тиесілі. Жақын маңда қосымша құрылыс нысандары да пайда болған.

Есіл өзені бойындағы жасанды аралда 2004 жылдан бастап Назарбаев отбасы мен жақын туыстарына тиесілі ондаған зәулім сарай салынған. Бірнешеуіне "Байтау" қоры арқылы иелік етілген.

Ақорда маңында орналасқан төрт сарай да президенттің іс басқармасына қарайды. Қолданыс мақсаты ашық емес.

АЛМАТЫДАҒЫ РЕЗИДЕНЦИЯЛАР

Алматыда, Қонаев пен Колбин тұрған делінетін саяжай Назарбаев билігі кезінде жекешелендірілген. Ол әлі де экс-президенттің меншігінде. Оның үстіңгі жағында орналасқан 2300 шаршы метрлік жаңа сарай да "Байтау" қоры арқылы тіркелген.

2019 жылы Алматыда жаңа мемлекеттік резиденция құрылысы басталды. Қазір құрылыс аяқталған. Оны B&A Contractors компаниясы салған. Бұл компания Астанадағы жасыл белдеудегі резиденцияны да тұрғызған.

Медеу ауданында, Керей-Жәнібек хандар көшесінде Назарбаевқа қарасты саяжай мен Тоқаевтың іс басқармасына тиесілі сарай көрші орналасқан.

ҚҰРЫЛҒАН ЖӘНЕ ҚҰРТЫЛҒАН РЕЗИДЕНЦИЯЛАР

Алматыдағы бұрынғы әкімшілік резиденция Қаңтар оқиғасы кезінде бүлініп, кейін сүріліп тасталды. Оның орнына саябақ салынатыны хабарланған. Президент әкімшілігі көрші орналасқан, бұған дейін Назарбаев қорына тиесілі ғимаратқа көшірілді. Ол нысан 2023 жылы мемлекет меншігіне қайтарылған.

СҰРАҚТАР ЖАУАПСЫЗ ҚАЛУДА

2023 жылы "Елбасы туралы заң" күшін жойды. Бірақ оған дейін де бірқатар резиденция жекешеленіп үлгерген. Азаттық бұл үдерістің заңдылығы тергеліп жатыр ма деген сұраққа нақты жауап ала алмады. Қайтарылған резиденциялар қандай шартпен мемлекетке берілгені де белгісіз.

Президент Тоқаев бұрынғы резиденцияларды оңалту мекемелері мен лагерьлерге айналдыруды тапсырғанымен, жаңа резиденциялар құрылысы тоқтамаған. Бұған қандай қажеттілік болғаны, қанша қаражат кеткені туралы да ресми ақпарат жоқ.