Қазақтелеком халықтың 30 миллион теңгесін алаяқтардан аман алып қалды

Қазақтелеком компаниясының Антифрод колл-орталығы құқық қорғау органдарымен бірлесіп, еліміздің екі тұрғынының жалпы сомасы 30 млн теңге қаражатын телефон алаяқтарынан аман алып қалды, деп хабарлайды Politico.kz.

Бас прокуратураның бастамасымен құрылған арнайы бөлімше шілде айында екі ірі қылмыстың жолын кесті. Алғашқы оқиға 10 шілдеде тіркеліп, 1950 жылы туған тұрғын пәтерін сатудан түскен 20 млн теңге депозитін шешіп, онлайн ұрылардың психологиялық ықпалымен ақшаны жалған қауіпсіз шотқа аудармақ болған. Алайда мамандар мен полиция қызметкерлері дер кезінде араласып, бұл заңсыз операцияны тоқтатып үлгерген.

Арада үш күн өткен соң Шымкент қаласында 1978 жылы туған тағы бір тұрғын алаяқтардың нұсқауына сеніп, 10 млн теңгесін өзге шотқа аударуға дайындалады. Бұл туралы сигнал түскен бойда Антифрод бөлімшесі мен Киберпол қызметкерлері жедел әрекет етіп, жәбірленуші және оның туыстарымен профилактикалық түсіндіру жұмыстарын жүргізу арқылы ақшаның бөгде қолға өтіп кетуіне тосқауыл қойды.

Қазіргі таңда қылмыскерлер әлеуметтік инженерия әдістерін кеңінен қолданып, өздерін банк, мемлекеттік орган немесе байланыс операторының маманы ретінде таныстырады. Осыған байланысты компания өкілдері азаматтарды ешқашан ақшаны қауіпсіз немесе резервтік шоттарға аудармауға, SMS арқылы келген кодтар мен құпиясөздерді бөгде адамдарға айтпауға шақырады. Сонымен қатар күмәнді қоңыраулар түскен жағдайда әңгімені бірден үзіп, ұйымның ресми сайтындағы нөмірге тікелей хабарласқан жөн екені ескертіледі.

Антифрод колл-орталығының күнделікті жұмысының нәтижесінде түрлі алаяқтық тәсілдер әшкереленіп, тұрғындардың ақшасын жымқыру әрекеттері тоқтатылып жатыр. Алдағы уақытта ұлттық оператор мемлекеттік органдармен бірлесе отырып, халықты телефон және интернет алаяқтарынан қорғау құралдарын одан әрі жетілдіре бермек.