ҚҚДИ сауалнамасына қатысқандардың 86,7%-ы Президентке сенім білдірген

Сауалнамаға қатысқан қазақстандықтардың 86,7%-ы Президентке сенетінін айтқан, деп хабарлайды Politico.kz «Қазақстандық қоғамдық даму институты» КЕАҚ мәліметіне сілтеме жасап.

Бұл дерек институттың 2026 жылдың 3-тоқсанындағы қоғамдық-саяси жағдайдың негізгі индикаторларына арналған зерттеуінде келтірілген. Президентке сенім көрсеткіші өткен жылдың осы кезеңімен салыстырғанда 3 тармаққа өскен.

Институт сенімнің жоғары деңгейін енгізіліп жатқан өзгерістердің үнемі қоғам назарында болуымен байланыстырады. Сауалнамаға қатысқандардың 65,8%-ы Президент бастамалары туралы ақпаратты тұрақты түрде немесе ара-тұра алып тұратынын айтқан.

Зерттеуге сәйкес, азаматтар Қасым-Жомарт Тоқаевтың бірқатар бастамасын қолдайды. Олардың арасында өткен жылғы Қазақстан халқына Жолдауында айтылған және қазір жүзеге асырылып жатқан бастамалар да бар.

Ең көп қолдау тапқан 3 бастаманың қатарына бір палаталы Құрылтайға көшу мен 2026 жылды Цифрландыру және жасанды интеллект жылы деп жариялау кірген. Сондай-ақ осы қатарда «Ұлттық қор – балаларға» жобасы бойынша тұрғын үй жағдайын жақсартуға және білім алуға арналған қаражатты есептеу мен пайдалану бар.

Технологиялық даму, атом энергетикасы, білім мен ғылым саласындағы бастамалар да қоғамның елеулі қызығушылығын тудырған. Азаматтар «Таза Қазақстан» аясында атқарылып жатқан жұмыстарға да назар аударып отыр.

Институттың бағалауынша, азаматтар ел дамуының жалпы бағытымен бірге мемлекеттік институттардың құрылымына, жаңа технологияларға, адами капиталға және өмір сапасына қатысты нақты шешімдерді қолдайды. Зерттеу қорытындысында негізгі мемлекеттік институттарға сенім тұрақты сақталғаны, ал елдегі жағдайды тұрғындардың басым бөлігі оң бағалайтыны айтылған.

Сауалнама 31 шілде мен 16 тамыз аралығында жүргізіліп, оған 18 жастан асқан 2 400 адам қатысқан. Ұлттық іріктеме Қазақстанның ересек тұрғындарының жынысы, жасы, елді мекен түрі және тұратын өңірі бойынша құрамын ескеріп жасалған. Іріктеменің ең жоғары ауытқу шегі 95% сенімділік ықтималдығында ±2%-дан аспайды.