«Талибан» – Ресейде енді террористік ұйым емес

Жоғарғы сот «Талибанды» террористік ұйымдар тізімінен алып тастады, деп хабарлайды POLITICO.KZ.

Ресейдің Жоғарғы соты Бас прокуратураның талап-арызын қанағаттандырып, «Талибан» қозғалысының ел аумағындағы қызметіне салынған тыйымды ресми түрде тоқтатты. Бұл шешім бірден күшіне енді, яғни, қазіргі сәттен бастап-ақ, заңды түрде әрекет ете бастайды.

«Талибан» қозғалысы Ресейде 2003 жылдың наурыз айында террористік ұйым деп танылған болатын. Алайда 2024 жылы Ресейдің Сыртқы істер министрлігі мен Әділет министрлігі президент Владимир Путинге бұл ұйымды тыйым салынған ұйымдар тізімінен алып тастауға болатынын баяндады. Президент бұл ұсынысқа байсалды түрде жауап беріп, «Кабулмен қарым-қатынасты қалай да болса қалыптастыру керек» деп мәлімдеді.

Айта кетейік, талибтер 2021 жылдың тамызынан бері Ауғанстанда билікті толықтай өз қолына алған. Сол уақыттан бастап елдегі әйелдер құқығының жағдайы күрт нашарлап, қатты алаңдаушылық тудырып отыр. Мәселен, талибтер әйелдерге бір-бірінің алдында дауыстап дұға етуге, сондай-ақ қоғамдық орындарда сөйлесуге қатаң түрде тыйым салған.

Бұл шешім халықаралық деңгейде түрлі реакциялар тудырып, көптеген құқық қорғау ұйымдары мен сарапшылар тарапынан өткір сынға ұшырауы әбден мүмкін.