Таразда полиция қызметкері жалға алынған пәтерде өлі күйінде табылды

Тараз қаласында қайғылы оқиға тіркелді: тәулікке жалға алынған пәтерден полиция қызметкерінің мәйіті табылды, деп хабарлайды POLITICO.KZ Alash.KZ порталына сілтеме жасап.

Пәтер иесі үйді тексеруге келген кезде 34 жастағы тәртіп сақшысының асылып тұрғанын көріп, бірден тиісті органдарға хабар берген.

Белгілі болғандай, марқұм пәтерді алдыңғы кеште жалға алған. Полициядағы дереккөздердің мәліметінше, ол – Тараз қалалық полиция басқармасының жедел уәкілі Е.Ш., және оның денесінен ешқандай зорлық-зомбылық белгілері табылмаған.

Қазіргі таңда аталған факті бойынша тергеу басталды. Қылмыстық кодекстің 105-бабының 1-бөлігі — “өзін-өзі өлтіруге дейін жеткізу” бойынша іс қозғалып, қажетті сараптамалар тағайындалды. Тергеу нәтижесінде бұл оқиғаның нақты себептері мен мән-жайы анықталатын болады.