Трамп Ресеймен ядролық қарусыздану жөнінде келіссөздер өткізгісі келеді

АҚШ президенті Дональд Трамп ядролық қарудан бас тартуға шақырып, Ресеймен денуклеаризация туралы келіссөздер бастағысы келетінін мәлімдеді, деп хабарлайды POLITICO.KZ.

«Бәріміз ядролық қаруымыздан құтылсақ, керемет болар еді. Бізде, Ресейде және жақын арада Қытайда да ядролық қару көп болады. Оның күші ессіз деңгейде», – деді Трамп Ақ үйде сөйлеген сөзінде.

Трамптың айтуынша, Қытай төрағасы Си Цзиньпин де бұл бастаманы қолдауға дайын.

Сарапшылар Трамптың бұл мәлімдемесі Ресеймен стратегиялық қару-жарақтарды шектеу туралы жаңа келіссөздер басталуы мүмкін екенін білдіруі мүмкін деп болжайды. Бұған дейін АҚШ пен Ресей арасында ядролық қаруды шектеуге бағытталған New START келісімі (Стратегиялық шабуыл қаруларын қысқарту туралы келісім) болған, алайда оның мерзімі 2026 жылы аяқталады.

АҚШ пен Ресей арасындағы ядролық қару-жарақты азайту мәселесі бұрыннан талқыланып келеді. Алайда, екі ел арасындағы саяси шиеленіс жағдайында мұндай келіссөздер бастала ма, жоқ па – ол жағы белгісіз.