Зеленский: «Ресей тағы бір апта уақыт ұрлады»

Украина президенті Владимир Зеленский елдің қорғаныс жағдайы туралы мәлімдеме жасады, деп хабарлайды POLITICO.KZ.

Зеленский өзінің Telegram-арнасында Украина Қарулы Күштері бас қолбасшысының жағдай туралы баяндамасын тыңдағанын мәлімдеді. Оның айтуынша, майдандағы шайқастар Харьков, Купянск және оңтүстік бағыттарда жалғасуда.

«Әскери іс-қимылдар барлық негізгі бағыттарда жүріп жатыр. Біз өз тәуелсіздігімізді, халқымызды және мемлекетті қорғау үшін күресудеміз», – деді Украина президенті.

Зеленский сонымен қатар Джидде қаласында өткен келіссөздер мен АҚШ-тың уақытша бітім туралы ұсынысынан кейін Ресей тағы бір апта уақыт ұрлады деп мәлімдеді.

«Ресей тағы бір апта соғысқа жұмсады, бұл соғыс тек Ресейге қажет. Біз дипломатияны күшейту үшін барлығын жасаймыз. Дипломатиялық жолмен нәтижеге жету маңызды», – деп атап өтті ол.

Президент украиналық әскерилердің жанқиярлық еңбегін ерекше атап өтіп, Украина армиясына қолдау көрсетудің маңызды екенін еске салды.

«Әрбір украиналық, әрбір әскери бөлімше, әрбір ерікті және қорғанысқа көмектесетін әр азамат – біздің елдің тірегі. Олардың қажырлы еңбегі мен батылдығы – Украина тәуелсіздігінің кепілі», – деді Зеленский.