Жамбылда департамент басшысы пара алды деген күдікке ілінді
Жамбыл облысында ҚР Денсаулық сақтау министрлігіне қарасты комитеттің медициналық және фармацевтикалық бақылау департаментінде пара алу дерегі бойынша қылмыстық іс тергелуде, деп хабарлайды Politico.kz
Дереккөздердің мәліметінше, аталған департаменттің басшысы Айгүл Балғабаева пара алды деген күдікпен ұсталған.
— Қылмыстық іс ҚР Қылмыстық кодексінің 366-бабының 2-бөлігі бойынша тіркелді. Қазіргі уақытта тергеу амалдары жүргізіліп жатыр, — деп хабарлайды дереккөздер.
Ал департаменттің өзінде күдікті тұлғаның қазір ауруханада ем қабылдап жатқанын, яғни еңбекке жарамсыздық парағында екенін айтқан.
Айта кетейік, Айгүл Балғабаева бұл қызметке 2024 жылдың 30 қыркүйегінде тағайындалған. Бұған дейін, өткен жылы департамент басшысының орынбасары Мәдина Шиналиева сыбайлас жемқорлық дерегі бойынша сотталған болатын.
Қазіргі уақытта ресми органдар бұл жағдайға қатысты әзірге пікір білдірген жоқ.
Соңғы жаңалықтар
