Жастарға бөлінген 425 миллион қайда кетті? Ақтөбелік шенеуніктер жастардың ақшасын қалай жаратқаны белгісіз

Ақтөбе облысында студенттік жасақтар мен «Жасыл ел» бағдарламасын жүзеге асыру үшін бюджеттен рекордтық сома бөлінген. Алайда, 425 миллион теңгеден астам қаржының нақты қайда жұмсалып жатқаны қоғам үшін беймәлім күйінде қалып отыр, деп хабарлайды Politico.kz.

2025 жылдың басында басқарма жалпы құны 455 миллион теңгеден асатын екі келісімшарт жасасқан болатын. Оның ішіндегі ең ірісі студенттік жасақтар мен «Жасыл ел» бағдарламасын қамтамасыз етуге бағытталған 425,5 миллион теңгелік лот болып табылады. Мемлекеттік сатып алу порталындағы деректерге сүйенсек мердігердің есепшотына қазірдің өзінде 415 миллион теңге аударылып қойған.

Келісімшарт шарттарына сәйкес орындаушы тарап бағдарламаның барлық қызметін атқаруға міндеттелген. Оған штаб жұмысы, жастарды қабылдау, арнайы киіммен қамту, маусымның ашылуы мен жабылу салтанатын және қорытынды шараларды ұйымдастыру кіреді. Келісімшарт мерзімі жыл соңына дейін жарамды деп көрсетілген. Дегенмен ашық дереккөздерде нақты қанша жас жұмыспен қамтылғаны, қаражаттың қанша бөлігі жабдықтарға және қаншасы қатысушылардың төлемақысына жұмсалғаны туралы толық ақпарат пен смета жарияланбаған.

Ерекше назар аударатын жайт ретінде 2024 жылы дәл осындай мақсаттағы сатып алу құнының биылғыдан шамамен 200 миллион теңгеге арзан болғанын айтуға болады. Қаржыландырудың бұлайша күрт өсуі қазіргі келісімшартқа қандай қосымша қызметтер мен жұмыстар енгізілгені туралы сұрақтар туғызады.

Бұл қомақты қаржы бөлу мәселесі өңірдегі жастардың әлеуметтік ахуалы қиындап тұрған шақта көтерілді. Arasha.kz порталының талдауы бойынша Ақтөбе, Жетісу, Қарағанды облыстары мен Қонаев қаласы жастармен жұмыс істеу көрсеткіштері бойынша артта қалған. Ресми статистикаға сәйкес облыста 268 мыңға жуық жас тұрады. Биылғы бірінші тоқсанның қорытындысы бойынша өңірде жастар жұмыссыздығы өскен. Ал оқымайтын және жұмыс істемейтін NEET санатындағылардың үлесі республикалық деңгейден жоғары болып отыр.

Сонымен қатар облыс жастар арасындағы құқық бұзушылық деңгейі жоғары және суицидке оқталу деректері азаймаған аймақтар қатарында тұр. Яғни, бюджеттен жүздеген миллион теңге бөлініп жатқанымен, оның нақты нәтижесі мен жастарға тигізіп жатқан пайдасы күмән тудырады.

Бұл мақала ресми сауал ретінде жолданады және басқармадан түскен жауап толық жарияланатын болады.