Астанада әйелді екі баласының көзінше өлтірген ер адам жазадан құтылып кетуі мүмкін

Астанада әйелді екі баласының көзінше өлтірген ер адам сот-психиатриялық сараптама қорытындысымен жазадан құтылып кетуі мүмкін, деп хабарлайды Orda.kz.

Оқиға 2025 жылдың 19 маусымында елордадағы көпқабатты тұрғын үйлердің бірінде болған. Бұрын ажырасып, екі баланы өзі тәрбиелеп келген Сания Алимажанова есімді әйел өз пәтерінде пышақ жарақатынан қаза тапты. Марқұм мен ер адам заңды некеде тұрмаған. Әйелдің туған әпкесі Алуа Сайдалинаның сөзінше, қайғылы оқиғаға дейін Сания оның құмар ойынға тәуелді екенін және 10 миллион теңге қарызы бар екенін біліп, онымен қарым-қатынасты үзбек болған.

Қылмыс болар күні марқұм полицияға хабарласып, өзіне қауіп төніп тұрғанын жеткізген. Туыстарының болжамынша, осы қоңыраудан кейін ер адам әйелді кішкентай балаларының алдында ұрып-соғып, артынша пышақтаған.

Осыдан кейін ол шатырға шығатын қосалқы сатыдан секіріп кетіп, төменде тұрған көліктің үстіне құлаған. Ауруханаға түскен азаматтың миы зақымдалып, омыртқасы мен сүйектері сынғаны анықталды.

Бұл істегі басты мәселе ер адамның психикалық саулығына байланысты болып тұр. Тамыз және қазан айларында жасалған алғашқы екі сараптама оның жарақатына байланысты қылмыс кезіндегі жағдайын нақты анықтай алмаған. Алайда желтоқсандағы үшінші тексеріс оны есі дұрыс емес деп таныған.

«Сарапшылар оның миына органикалық зақым келгенін және антероградтық амнезия бар екенін айтқан. Яғни, ол белгілі бір уақыттағы оқиғаларды еске түсіре алмайды. Дәл осы қорытындының негізінде іс қылмыстық жаза емес, мәжбүрлі емдеу шарасына бағытталуы мүмкін», – деді әпкесі.

Қыздың жақындары бұл қорытындымен келіспейді. Олар ер адамның балалық шағын, отбасын және тіпті телефон нөмірін де жатқа білетінін, тек қылмыс болған күнді ғана есіне түсіре алмайтынын айтады. Егер сот бұл шешімді қабылдаса, ер адам қылмыстық жауапкершіліктен босатылып, психиатриялық мекемеге жіберіледі.

«Бірақ мұндай емдеу де ұзаққа созылмайды. Егер дәрігерлер оны қоғамға қауіпсіз деп тапса, ол бостандыққа шығуы мүмкін. Екі баланың көзінше жасалған қылмыс жазасыз қалмауы керек», – деді Алуа.

Марқұмның отбасы тергеу жұмыстарының шикілігі көп екеніне шағымданды. Олар қос тараптың ұялы телефондары толық тексерілмегенін және тұрғын үй кешеніндегі бейнекамералардың тек қысқа үзінділері ғана қаралғанын алға тартты. Сонымен қатар ресми ақпаратта ер адам 25 қабаттан секіргені айтылғанымен, туыстары мұндай биіктіктен құлаған адамның тірі қалуы мүмкін емес деп санайды.

«Егер ол 25-қабаттан құламаған болса, онда әдейі төменірек қабатқа түскен болуы мүмкін, яғни қатты құлап кетпеу немесе өлмеу үшін. Мүмкін, ол қашуға тырысқан, бірақ жолы болмай, көліктің үстіне құлаған. Сонымен қатар, кейбіреулер төменде оны біреу күтіп тұрған болуы мүмкін деп айтады. Мүмкін, ол сондықтан ортақ есік арқылы шығуға қорыққан шығар, өйткені кіреберістің алдында көлікте оны күтіп тұрған адамдар болуы мүмкін. Бұған қоса, Сания оның көзінше полицияға қоңырау шалған. Ол жақын арада полиция қызметкерлері келетінін, лифтіде де оны ұстап алуы мүмкін екенін түсінген. Сол себепті ол қашуға әрекет жасаған болуы мүмкін», – деді марқұмның әпкесі.

Аталған факті бойынша қозғалған қылмыстық іс Астана қаласының мамандандырылған ауданаралық қылмыстық сотында қаралады. Алғашқы сот отырысы 12 наурызға белгіленген.