Балқаш халқы металлургтер күнін жағажайда дүркіретіп тойлады

17 шілде күні Балқаш көлінің жағалауында Металлургтер күніне арналған ауқымды Metallurg Fest мерекелік концерті өтіп, оған мыңдаған қала тұрғыны мен қонақтары жиналды, деп хабарлайды Politico.kz.

Кештің басты музыкалық оқиғасы көл жағасын ашық аспан астындағы үлкен би алаңына айналдырған «Ирина Кайратовна» тобының өнері болды. Сахнада Болат Құсайынов, Жанар Дұғалова және аты аңызға айналған «Ялла» вокалды-аспаптық ансамблі ән шырқап, көрермендерге ерекше көңіл күй сыйлады.

Мерекелік бағдарламаны Timur Teams ұжымы мен IL’HAN бастап берсе, Балқаш мыс қорыту зауытының қызметкерлері Ерсұлтан Сәкенов пен Әділжан Бисенбаевтың ERS & Adilzhanym сахналық есімімен шығуы көпшіліктің ыстық ықыласына бөленді. Олардың металлургтердің өмірі мен еңбегіне арналған әндері тыңдарман жүрегінен орын тапты, ал CrossFire тобы ұлттық нақыш пен заманауи хореографияны ұштастырған «Салтанат» жарық шоуын көрсетті.

Шара барысында қонақтар үшін интерактивті аймақтар мен балалар алаңқайлары жұмыс істеп, металлургтердің еңбегі мен «Қазақмыс» компаниясының тарихына арналған ұжымдық арт-панно құру кеңістігі ұйымдастырылды. Концертті жүргізген Марат Оралғазин мен Еркебұлан Мырзабек жиналған қауыммен еркін араласып, қоршаған ортаны қорғау мен мереке аумағында тазалық сақтаудың маңыздылығын еске салып отырды. Бұл мерекенің Балқаш үшін орны ерекше, себебі қаланың тарихы мен дамуы металлургия өндірісімен тығыз байланысты және бұл күн отандық өнеркәсіпке үлес қосып жүрген еңбек адамдарына деген құрметтің белгісіне айналды.

Ауқымды фестиваль сала мамандарының құрметіне атылған жарқын отшашумен аяқталды. Кеш барысында құқық қорғау органдарының қызметкерлері қауіпсіздікті қамтамасыз етсе, шарадан кейін коммуналдық қызмет жұмысшылары мен бейжай қарамайтын тұрғындар жағалау аумағын қоқыстан тазартты.