Дала қырандары рецептсіз дәрі сатқан дәріхананы әшкереледі

«Дала Қырандары» ұйымының SAQ жасағы Aura Farma дәріханасынан прегабалиннің заңсыз сатылуын анықтады, деп хабарлайды Politico.kz.

21 қарашада «Дала Қырандары» жастар қозғалысына қарасты SAQ жасағы Байтурсынұлы көшесі, 23/2 мекенжайында орналасқан Aura Farma дәріханасында рейд жүргізді. Бұған дейін дәл осы жерден кырандарға прегабалин препараты екі рет рецептсіз сатылған.

Кыраны видеодәлелдермен дәріханаға қайта келген кезде фармацевт препаратты рецептсіз сатқанын мойындамады. Оқиға орнына полиция шақырылды. Құқық қорғау қызметкерлері фармацевттен түсініктеме алып, таблеткаларды сараптамаға тәркіледі әрі видеоайғақтарды ресми дәлел ретінде қабылдады. Полицейлердің айтуынша, сараптама нәтижесінен кейін іс сотқа жіберіледі.

Соған қарамастан фармацевт өз әрекетін жоққа шығарып отыр. Кырандардың айтуынша, дәл сол қызметкер бұған дейін препаратты рецептсіз сатқан соң, оны қымбат бағамен өткізген.

Прегабалин – дұрыс пайдаланылмаған жағдайда тәуелділікті жылдам қалыптастыратын, эйфория, ес бұзылуы, мінез-құлықтың күрт өзгеруі сияқты қауіпті әсерлер туғызатын күшті препарат. Оны мақсатынан тыс қолдану көбейген сайын, препараттың заңсыз сатылуы үлкен қауіпке айналып келеді.

Рецептсіз дәрі-дәрмек сату – болмашы құқықбұзу емес. Бұл жасөспірімдер мен жастар денсаулығына қауіп төндіретін көлеңкелі нарықтың қалыптасуына жол ашады. Заң бәріне ортақ, ал қауіпсіздік мәселесі – біздің басты принципіміз.