Екібастұзда мас күйде мерседес тізгіндеген лауазымды шенеунік қамауға алынды
Екібастұз қалалық соты мас күйінде автокөлік басқарған мемлекеттік қызметкерге қатысты үкім шығарды. Лауазымды тұлға әкімшілік жауапкершілікке тартылып жүргізуші куәлігінен айырылды, деп жазады Politico.kz.
Kerek.pv telegram-арнасында жарияланған сот қаулысына сүйенсек, оқиға 2025 жылдың 14 желтоқсанында таңғы сағат 04:40 шамасында болған. Полиция қызметкерлері Энергетиктер көшесіндегі 66 үйдің тұсында Mercedes-Benz E240 маркалы автокөлігін тоқтатты. Тексеріс барысында көлікті тізгіндеген азаматтың ішімдік ішкені анықталды.
Рөлде отырған жүргізуші «Екібастұз қаласы әкімдігінің тұрғын үй-коммуналдық шаруашылығы жолаушылар көлігі және автомобиль жолдары» мемлекеттік мекемесі бөлімі басшысының орынбасары Айдын Төлегенұлы Қояғанов болып шықты. 1987 жылы туған шенеунікке қатысты Әкімшілік құқық бұзушылық туралы кодекстің 608 бабының 1 бөлігі бойынша хаттама толтырылды.
Сот отырысы сол күні жедел түрде өтті. Судья іс материалдарын қарап Айдын Қояғановты кінәлі деп таныды. Үкім бойынша Төлегенұлы 15 тәулікке әкімшілік қамаққа алынды және 7 жыл мерзімге көлік басқару құқығынан шектелді. Қамау мерзімі 14 желтоқсан күнгі таңғы сағат 06:20 уақытынан бастап есептеледі.
Сот шешіміне сәйкес шенеуніктің 2017 жылы алған жүргізуші куәлігі ішкі істер органдарына тапсырылуы тиіс. Ал тәркіленген автокөлік иесіне қайтарылды.
Соңғы жаңалықтар
