Лавров Ақордада
Мемлекет басшысы Қасым-Жомарт Тоқаев Ақордада Ресейдің сыртқы істер министрі Сергей Лавровпен кездесіп, Владимир Путиннің алдағы сапарын талқылады, деп хабарлайды Politico.kz.
Кездесу барысында президент екі ел арасындағы стратегиялық серіктестік жақсы дамып келе жатқанын атап өтті. Ол бұған дейін жасалған келісімдерді іске асырып, сауда мен мәдени байланыстарды одан әрі күшейту маңызды екенін жеткізді.
Тараптар негізінен Ресей басшысы Владимир Путиннің мамыр айының соңында Қазақстанға жасайтын сапарына дайындық барысын сөз етті. Өз кезегінде Сергей Лавров Путиннің келуіне орай қандай дайындық жұмыстары жүріп жатқанын баяндап берді.
«Бұл сапарды биылғы екіжақты күн тәртібінің ең негізгі іс-шарасы ретінде қарастырамыз. Екі елдің одақтастық қатынастарын ілгерілетуде аталған сапар маңызды рөл атқарады деп сенеміз», – деді Қасым-Жомарт Тоқаев.
Бұдан бөлек үкіметтер деңгейіндегі ынтымақтастық мәселелері қаралып, екі елдің өкілдері халықаралық және аймақтық тақырыптар төңірегінде пікір алмасты.
Соңғы жаңалықтар
