Макрон АҚШ-қа инвестицияны тоқтатуға шақырды
Франция Президенті Эмманюэль Макрон АҚШ енгізген жаңа тарифтерге байланысты еуропалық компанияларды АҚШ-қа инвестиция салуды уақытша тоқтатуға шақырды, деп хабарлайды POLITICO.KZ Le Monde басылымына сілтеме жасап.
Парижде өткен сала өкілдерімен кездесуде Макрон:
«Дональд Трамптың мәлімдемелері халықаралық сауда үшін шок болды», – деп атап өтті.
Ол АҚШ президентінің шешімін "қатыгез әрі негізсіз" деп бағалады. Макронның айтуынша, саудадағы теңсіздікті кедендік баж салығын енгізу арқылы шешу мүмкін емес.
АҚШ президенті жариялаған қосымша тарифтер Францияға және оның теңіздегі аумақтарына да әсер етеді. Мәселен, Реюньон мен Сен-Пьер және Микелон сияқты аумақтарға шектен тыс баж салығы салынбақ.
«Бұл шешім біздің экономиканың барлық секторларына әсер етеді», – деді Макрон.
Франция Президентінің айтуынша, алюминий, болат және автокөлік өнеркәсібінен басқа барлық секторлар үшін 20%-дық тариф енгізіледі, ал фармацевтика, ағаш өңдеу және автомобиль салаларында тариф кемінде 25% болады.
Макрон жаңа тарифтердің ең алдымен АҚШ экономикасына кері әсер ететінін айтты:
«Америкалық кәсіпорындар мен азаматтар әлсірейді және кедейленеді», – деп қорытындылады ол.
Президент Еуропаның жауап беретінін растады. Бірінші кезең мамырдың ортасында, ал екінші, ауқымды жауап ай соңында жарияланады.
Сонымен қатар Макрон еуропалық елдерді бірлікті сақтауға шақырып:
«Ірі державалардың жеке әрекет етуіне жол бермеу керек», – деді.
Өз сөзінің соңында Макрон:
«Біз аңғал емеспіз. Қорғануымыз керек. АҚШ-пен жағдай анықталғанша, жаңа инвестицияларды тоқтату маңызды», – деп мәлімдеді.
«Егер ірі еуропалық компаниялар АҚШ экономикасына миллиардтаған еуро инвестициялай берсе, бұл қандай белгі береді?» – деп сұрады ол.
Соңғы жаңалықтар
