Президент алдағы үш жылға арналған бюджетті бекітті: Тоқаев жаңа заңға қол қойды

Мемлекет басшысы Қасым-Жомарт Тоқаев алдағы үш жылға арналған ел қазынасын бөлу тәртібін айқындайтын маңызды құжаттарды рәсімдеді, деп хабарлайды Politico.kz.

Президент бірден екі заңға қол қойды. Олар – «2026 – 2028 жылдарға арналған республикалық бюджет» және «Республикалық және облыстық бюджеттер, республикалық маңызы бар қалалар, астана бюджеттері арасындағы 2026 – 2028 жылдарға арналған жалпы сипаттағы трансферттердің көлемі туралы» заңдар. Жаңа құжатқа сәйкес, 2026 жылдан бастап халықтың әлеуметтік жағдайына әсер ететін басты қаржылық көрсеткіштер жаңартылды.

• Мәселен, Айлық есептік көрсеткіш 4 325 теңгеге дейін көтеріледі (2025 жылы 3 932 теңге)
• Ең төменгі зейнетақы мөлшері 69 049 теңгеге жетсе (2025 жылы 62 771 теңге), мемлекеттік базалық зейнетақы төлемінің ең төменгі мөлшері 35 596 теңге болып бекітілді (2025 жылы 32 360 теңге).
• Ал күнкөріс деңгейі 50 851 теңге межесінде белгіленіп отыр (2025 жылы 46 228 теңге).
• Дегенмен, барлық көрсеткіш бірдей өскен жоқ. Көпшілікті мазалайтын ең төменгі жалақы мөлшері өзгеріссіз, 85 000 теңге деңгейінде сақталып қалды.

Құжаттағы тағы бір назар аударарлық тұс – бюджет шығысының ауқымы. Бекітілген жоспарға сай, мемлекеттік шығыстар жыл сайын шамамен 1 триллион теңгеге ұлғайып отырмақ.