Прокурор Пакты 10 жылға соттауды сұрады

Әл-Фараби даңғылындағы адам өліміне әкелген жол-көлік оқиғасы бойынша Александр Пакқа 10 жыл жаза сұралды, деп хабарлайды Politico.kz.

Алматыда Әл-Фараби даңғылында болған адам өліміне әкелген жол-көлік оқиғасы бойынша сот жарыссөзі басталды. 

22 маусымдағы сот отырысында мемлекеттік айыптаушы Пактың кінәсі толық дәлелденгенін мәлімдеп, соттан оны 10 жылға бас бостандығынан айыруды сұрады.

Бұған дейін жәбірленушілердің бір бөлігі Пакты бас бостандығынан айырмауды өтінген болатын. Атап айтқанда, қаза тапқан Томирис Қыдырбектің анасы сотта сотталушыны кешіргенін және оған ешқандай талабы жоқ екенін айтқан.

Алайда кейін сот Томиристің әкесін де жәбірленуші ретінде таныды. Ол қарсы ұстаным білдіріп, Пакты кешірмейтінін мәлімдеді. Кейін одан моральдық зиян ретінде 100 миллион теңге өндіріп алуды талап етті.