«Қадағалауға деген құмарлығыңызды қадағалаңыз»: Астана әкімдігі белсенділердің жұмысына кедергі келтірді

Астанадағы «Жаңа адамдар» қозғалысының 124 бастамасы белсенділерінің жұмысына әкімдік өкілдері кедергі келтірді. Бұл туралы ұйым өкілдері мәлімдеді, деп хабарлайды POLITICO.KZ.

124 бастамасы бір жыл бұрын іске қосылған. Белсенділер ай сайын балаларға қауіп төндіретін, оларды жыныстық нысан ретінде қарастыратын тұлғаларды әшкерелеп, құқық қорғау органдарына деректер тапсырып келеді. Осы арқылы бірқатар күдіктілер ұсталған.

Алайда соңғы оқиғада жағдай басқаша өрбіген. Белсенділер әлеуетті педофилмен кездесу дайындап жатқанда, күдікті жоспарланған уақытта келмей қалған. Кейін белгілі болғандай, іске Астана қаласы Есіл ауданы әкімдігінің ішкі саясат бөлімінің қызметкері Әли Жолтабар араласқан.

Белсенділердің камерасына оның кинорум иесімен әңгімесі жазылып қалған. Жазбада Жолтабардың: «Мен оларды аңдып жүрмін, бұл акцияның алдын алдық» деген сөзі анық естіледі. Оның айтуынша, күдікті кинорумға жетпей тұрып ұсталған.

Белсенділер үшін бастысы — қылмыскердің қолға түсуі. Бірақ олар әкімдік өкілінің азаматтық бастаманы қолдаудың орнына бақылау мен аңду тәсілін таңдағанына қынжылыс білдіреді.

«Жаңа адамдар» қозғалысы балаларды қорғау қоғамның ортақ міндеті екенін атап өтті. Олардың айтуынша, ата-ана, мұғалім, көрші — барлығы мұқият болуы тиіс. Қозғалыстың мақсаты — әлеуетті қылмыскерлерді қоғамға жария етіп, олардың басты қаруы саналатын анонимділіктен айыру.

Белсенділердің пікірінше, ішкі саясат органдары ресурстарын азаматтық бастамаларды аңдуға емес, әріптестікке бағыттау қажет.

Қозғалыс өкілі Қуаныш Алмат былай дейді:

«Құрметті Жолтабар Әли! Өзіңізге сұрақ қойыңыз. Сіз шынымен қоғам қауіпсіздігі үшін жұмыс істеп жүрсіз бе, әлде азаматтық бастаманы қарсылас көресіз бе? Қорытынды сөзіміз: қадағалауға деген ынтаңызды қадағалаңыз».