Қазақстанда бензиннің нақты бағасы $1-дан асып кетті
Қазақстанда халықтың сатып алу қабілеті бойынша есептегенде АИ-95 пен АИ-98 маркалы бензиннің литрі $1-дан асып кетті, деп хабарлайды Politico.kz.
PACE Analytics аналитикалық компаниясының жазуынша, ресми валюта бағамы тек сыртқы құнды көрсетеді, ал отандық тұтынушы үшін табыстың нақты ішкі сатып алу қабілеті маңыздырақ.
Сарапшылардың пайымдауынша, қазіргі уақытта теңге долларға шаққанда шамамен 40–43 пайызға төмен бағаланып отыр. Егер уақытша әділ бағам 477 теңге емес, 272–286 теңге деңгейінде есептелсе, нарықтағы шынайы көрініс түбегейлі өзгереді.
Аналитиктердің мәлімдеуінше, литрі 244–245 теңге болатын АИ-92 бензині қазақстандықтар үшін іс жүзінде $0.85–0.90 деңгейінде бағаланады. Ал 312–317 теңге тұратын АИ-95 маркасы $1.09–1.17 болса, 355–365 теңгелік АИ-98 жанармайы $1.24–1.34 құрайды.
Зерттеуде жанар-жағармай ресми түрде арзан көрінгенімен, халықтың табысына шаққанда оның қолжетімді емес екені айтылған. Сондықтан бағаның бірнеше теңгеге өсуі отбасылық бюджетке қатты әсер етеді және нақты экономикалық жағдайда бензин қазақстандықтар үшін Еуропадағыдай қымбат болып саналады.
Соңғы жаңалықтар
