Шәріп Серік өзін Бишімбаевпен қатар қойып видео жасаған адамды сотқа берді

Шәріп Серік өзін Бишімбаевпен қатар қойып видео жасаған адамның үстінен арыз жазды, деп хабарлайды POLITICO.KZ. 

Актер полицияға жасанды интеллектпен Қуандық Бишімбаевтың жанына отырған видео үшін арызданды. Бұл туралы Instagram желісінде бейнежазбаның авторы хабарлады. Сондай-ақ мұны Шәріп Серік те блогер Әлішер Елікбаевқа берген сұхбатында растады. 

Серік бұл бейнежазба оның көңіліне ауыр тигенін айтты. 

«Мен бұл бейнежазба таралған соң, жала жабу және қорлау фактілері бойынша киберполицияға арыз жаздым», — деді ол сұхбатында.

Ал бейнежазбаны жасаған автор өз жұмысының «зорлық-зомбылыққа қарсы азаматтық ұстанымды шығармашылық тұрғыдан жеткізу» екенін және оның «Қазақстанда зорлық-зомбылыққа жол жоқ» деген атаумен жарияланғанын түсіндірді.