СІМ Грузияда ұсталған қазақстандық туралы мәлімдеме жасады

Қазақстан сыртқы істер министрлігі 2026 жылы 22 сәуірде Грузияның Имерети аймағында Қазақстан азаматы Ә.Дастанның ұсталғанын растады, деп хабарлайды Politico.kz.

«Қолда бар мәліметтерге сәйкес, Грузияның құқық қорғау органдары азаматымызға Грузия Қылмыстық кодексінің 260-бабы 1-бөлігінде қарастырылған (есірткі құралдарын заңсыз иемдену және сақтау) құқық бұзушылық жасады деген айып тағып отыр», - делінген министрлік хабарламасында.

Министрліктің мәліметінше, Қазақстан консулы істің барлық мән-жайын анықтау үшін Грузияның құзыретті органдарымен тікелей байланыста. Мәселе Министрліктің бақылауында.

Грузияда 18 жастағы Қазақстан азаматы есірткінің аса ірі көлемдегі заңсыз айналымына қатысты күдікпен ұсталғанын Грузия ІІМ хабарлаған еді. 

Тінту кезінде күдіктілерден көп мөлшерде метадон және оны бөлшектеуге арналған құралдар тәркіленген. 

Сонымен қатар полиция қызметкерлері есірткі заттарын өлшеп-орауға пайдаланылды деген болжаммен тиісті материалдарды тауып, тәркіледі.

Тергеу амалдары Грузия Қылмыстық кодексінің 260-бабы бойынша жүргізіліп жатқаны нақтыланды.