Украиналық дрондар Қазақстаннан ұшырылды ма: саясаттанушы пікір білдірді

Саясаттанушы Марат Шибутов ресейлік Telegram арналарында тарап жатқан украиналық ұшқышсыз ұшу аппараттары Қазақстан аумағынан ұшырылуы мүмкін деген болжамдарға пікір білдірді деп хабарлайды Politico.kz.

Оның пікірінше, мұндай мәлімдемелер — жасырын сипаттағы болжамдар және Ресей нысандарының осалдығын Украинаның нақты әскери мүмкіндіктерімен емес, үшінші елдердің қатысуымен байланыстырғысы келетін әрекет.

Шибутовтың пайымдауынша, ресейлік ақпараттық алаңдар әлі күнге дейін бірнеше маңызды факторды мойындауға дайын емес. Атап айтқанда, Украинаның мың шақырымнан астам қашықтыққа ұша алатын алыс радиусты дрондары бар екені, Ресейдің әуе қорғаныс жүйелері тек шекара маңында ғана емес, ірі қалалардың айналасында да шоғырланғаны және Украинаға НАТО тарапынан үздіксіз барлау қолдауы көрсетіліп отырғаны.

Саясаттанушы Ресей аумағының түкпіріндегі нысандарға жасалған шабуылдарға ресейлік әскери тілшілердің эмоциялық реакциясын дәл осы факторлармен байланыстырды.

Сондай-ақ Шибутов бұған дейін Қазақстан аумағына құлаған дрондар мәселесіне де тоқталды. Оның болжамынша, олардың бір бөлігі ирандық үлгідегі аппараттардың көшірмесі саналатын ресейлік дрондар болуы ықтимал. Ол мұндай құрылғылар Ресейдің әскери полигондарынан, соның ішінде Қазақстан шекарасына жақын орналасқан Капустин Яр полигонынан ұшқан болуы мүмкін екенін айтты.

Ал Қазақстан аумағына түскен украиналық дрондарға қатысты саясаттанушы олардың Орынбор немесе Екатеринбург бағытындағы нысандарға бет алған болуы мүмкін екенін, алайда радиоэлектрондық күрес жүйелерінің әсерінен немесе техникалық ақау салдарынан бағытынан жаңылғанын жеткізді.

Шибутов сондай-ақ шабуылдардың географиясы дрондардың Қазақстан аумағынан ұшырылды деген нұсқаны растамайтынын атап өтті. Оның сөзінше, егер мұндай шабуылдар шынымен оңтүстіктен жасалса, онда негізгі нысаналар ретінде Түмен облысындағы объектілер, мұнай-газ инфрақұрылымы, компрессорлық станциялар мен Омбы мұнай өңдеу зауыты қарастырылар еді. Алайда саясаттанушының бағалауынша, украиналық дрондар оңтүстіктен солтүстікке қарай емес, негізінен батыстан шығысқа қарай ұшады.

Бұдан бөлек, Шибутов Ресей аумағында бұған дейін де диверсиялық әрекеттер болғанын еске салып, егер мұндай операциялар Ресейдің өз ішінде ұйымдастырылып келген болса, онда Украина үшін логистиканы Қазақстан арқылы күрделендірудің қажеттілігі жоқ екенін айтты.

Сөз соңында саясаттанушы ресейлік Telegram-арналарды нақты дәлелсіз Қазақстанға қатысты түрлі болжамдарды таратуды тоқтатуға шақырды.