Жақсылық Омар сотта кінәсін мойындады

Өскеменде Шығыс Қазақстан облысы әкімінің бірінші орынбасары Жақсылық Омарға қатысты атышулы сот процесі жалғасуда. Сот отырысы барысында ол өз кінәсін толық мойындады, деп хабарлайды Politico.kz YK-news.kz-ке сілтеме жасап.

2026 жылы 19 наурызда Өскемен қаласының қылмыстық істер жөніндегі ауданаралық сотында Шығыс Қазақстан облысы әкімінің бірінші орынбасары Жақсылық Омардың ісі қаралды. Шенеунікке Қылмыстық кодекстің бірден екі бабы («Алаяқтық» және «Ірі мөлшерде пара алу») бойынша айып тағылған.

Автокөлікке қатысты іс

Бірінші эпизод Жақсылық Омар Өскемен қаласының әкімі қызметін атқарған кезеңге қатысты. Айыптау нұсқасы бойынша, қала тұрғындарының бірі шенеуніктің өтінішімен жергілікті кәсіпорынға материалдық көмек ретінде автокөлік беру туралы өтініш жасаған. Осыдан кейін ол 2021 жылы шығарылған Toyota Camry 75 автокөлігін алған. Оның айтуынша, көлікті қалалық әкімдік ғимаратына жеткізіп, кілтін тапсырғаннан кейін көлікті қайта көрмеген. Кейін автокөлік үшінші тұлғаға рәсімделіп, trade-in бағдарламасы арқылы айыпталушы пайдаланған жаңа модельге айырбасталған. Тергеу дерегінше, осы әрекеттер нәтижесінде жәбірленушіге 13 миллион теңге көлемінде шығын келтірілген. Жақсылық Омарға Қылмыстық кодекстің 190-бабы 3-бөлігі 1 және 2-тармақтары бойынша («Ірі көлемдегі алаяқтық») айып тағылған. Сот отырысы барысында жәбірленуші келтірілген шығынның өтелгенін және ешқандай талабы жоқ екенін мәлімдеді.

Екінші эпизод

Екінші эпизод ақпан айының басында болған. Іс материалдарына сәйкес, Жақсылық Омар қалалық әкімдік қызметкерлерінің бірімен кездесу кезінде одан 20 миллион теңге әкелуді сұраған. Айыпталушының өзі бұл талап емес, өтініш болғанын айтады. Алайда айыптау тарапы бұл жағдайды жалпы қамқорлық үшін пара алу ретінде бағалады.

Ақша беру

Әкімдік қызметкері өтініштің заңсыз болуы мүмкін екеніне күдіктеніп, Ұлттық қауіпсіздік комитетіне жүгінген. Арнайы қызметтердің бақылауымен ол Жақсылық Омармен қайта кездесіп, ақшаны бөліп-бөліп беруді ұсынған. Айыпталушы бұған келіскен. Сол күні үшінші тұлға арқылы күдіктіге 6 миллион теңге қолма-қол берілген. Ұстау кезінде шенеуніктің тұрғылықты жерінен және жұмыс орнынан 5,6 миллион теңге табылған.

Өз кінәсін мойындау

Сот отырысы кезінде Жақсылық Омар өз кінәсін толық мойындады. Айыпталушының қорғаушылары бас бостандығынан айырумен байланысты емес жаза тағайындауды сұрады. Адвокаттардың айтуынша, туыстары ықтимал айыппұлды төлеу үшін қаражат жинап қойған. Мұны растау үшін сотқа 112 миллион теңге көлеміндегі шот үзіндісі ұсынылды. Іс бойынша келесі сот отырысы 26 наурызға белгіленді.

Осы жылдың ақпан айында әлеуметтік желілерде Жақсылық Омардың тұтқындалғаны туралы ақпарат тараған еді. Ол кезде Шығыс Қазақстан облысының әкімдігі бұл жаңалықты растамай, шенеуніктің денсаулығына байланысты уақытша демалысқа шыққанын алға тартқан. Дегенмен арада бір апта өтпей Ұлттық қауіпсіздік комитеті оның ұсталғаны туралы ресми мәлімет таратты.

Саяси қайраткер Бекболат Тілеуханның жиен күйеу баласы болып келетін Жақсылық Омар 1980 жылы 28 қыркүйекте Талдықорған облысы Алакөл ауданындағы Үшарал ауылында туған. Ол 2018-2024 жылдары Өскемен қаласын басқарып, кейін облыс әкімінің кеңесшісі қызметін атқарған. Ал 2025 жылдың 7 сәуірінен бастап Шығыс Қазақстан облысы әкімінің бірінші орынбасары лауазымына тағайындалған болатын.