«Қазақфильмнен» шеттетілген Азамат Сатыбалды астарлы жазба жариялады

Жуырда Шәкен Айманов атындағы «Қазақфильм» акционерлік қоғамының президенті қызметінен кеткен актер Азамат Сатыбалды жаңа жазба жариялады, деп хабарлады politico.kz Qaz365.kz-ке сілтеме жасап.

Жаңадан туған қасқыр балаларына азық іздеуге шыққанда, аңшы бөлтіріктерінің тірсегін кесіп кетеді. Тірсегі кесілген бөлтірік дімкәс болады, жатыпішер. Аузын ашып тамақ сұрай береді, одан басқаға шамасы жоқ. Анасы тамақ тасумен әуре. Содан қозғалмай жатып, ішіп-жеп, тойып алған қасқырдың семіретіні анық. Күндердің күні туғанда... Аңшы асықпай келіп, терісін бұзбай, олжасын алып кетеді екен. Солай, - деп жазды ол.

Айта кетсек, шілде айында «Қазақфильм» алдында «Қазақ анимация» шығармашылық бірлестігінің қызметкерлері наразылық білдірген болатын. Өйткені мемлекеттен бөлінген тиісті қаражат әлі күнге дейін қызметкерлерге берілмеген. Осыдан кейін көп уақыт өтпей, Азамат Сатыбалды қызметінен кетті. Экс-президент бұған дейін қызметкерлердің талап-арызын аяқтан шалу және жала жабу деп есептейтінін айтқан еді.