"135 млрд теңге". Үкімет тоғыз өңір тұрғындарының несиесін кешіретін болды

Ресей Федерациясының Үкіметі 9 өңірдің бюджет несиелері бойынша қарызын кешіреді. Жалпы сома шамамен 25,5 млрд рубльді құрайды. Бұл туралы РФ премьер-министрі Михаил Мишустин үкіметтің Telegram-арнасында хабарлады.

«Үкімет инфрақұрылымдық жобаларды жүзеге асырған тағы 9 өңірдің бюджет несиелерін кешірді», — делінген ресми хабарламада.

Мишустиннің айтуынша, қарыздан босатылған өңірлер қатарына Башқұртстан, Ингушетия, Удмуртия, Хакасия, сондай-ақ Астрахан, Кострома, Пенза, Саратов және Томск облыстары енді. Олардың әрқайсысына бюджет несиесінің үштен екі бөлігіне дейінгі қарызды өтеуден босату мүмкіндігі берілген.

Премьер-министрдің сөзінше, бұған дейін де өңірлерге ұлттық жобаларды іске асыруға, елді мекендерді дамытуға, сондай-ақ көпқабатты үйлердегі лифтілерді жаңартуға қаражат бөлінген болатын.

Мишустин бұл шешім өңірлердің қарыздық жүктемесін азайтып, аймақтық бюджет жүйесіне оң әсер етіп, халықтың өмір сапасын арттыруға ықпал ететінін атап өтті.