17 жастағы қызды зорлап өлтіру ісі: президент елде өлім жазасын енгізуді тапсырды

Ыстықкөлде 17 жастағы Айсұлудың қатыгездікпен өлтірілуі бүкіл қоғамды дүр сілкіндірген еді, бұл қылмыс ісі қазір президент Садыр Жапаровтың жеке бақылауында тұр.

Мемлекет басшысының баспасөз хатшысы Асқат Алагөзовтың мәлімдеуінше, президент әйелдер мен балаларға жасалған зорлық-зомбылық пен адам өлтіру қылмыстары үшін өлім жазасын енгізуді қарастыратын заңнамаға өзгерістер әзірлеуді тапсырды. Садыр Жапаров осындай қылмыстарға қатысты жазаның барынша қатаң болуы керектігін ерекше атап өтіп, Президент Әкімшілігінің Құқықтық қамтамасыз ету бөлімінің меңгерушісі Мұрат Укушевке тиісті түзетулер дайындауды жүктеді. Оның айтуынша, балалар мен әйелдерге қарсы зорлық пен қастандық жасағандар жазадан құтылмауы тиіс.

Айсұлу 27 қыркүйек күні көрші ауылдағы құрбысына кеткеннен кейін жоғалып кеткен. Екі күннен соң, 29 қыркүйекте, оның денесі Боом шатқалынан табылды. Тергеу барысында 41 жастағы Бішкек тұрғыны ұсталып, ол қызды ұрлап, зорлап, өлтіргенін мойындады. Ол мәйітті әуелі Ыстықкөлге көміп, кейін қайта қазып алып, Боом шатқалына апарып тастағанын айтқан. Жәбірленушінің отбасы күдіктінің бұған дейін де жыныстық сипаттағы зорлық-зомбылық қылмыстары бойынша айыпталғанын, бірақ жазадан құтылып кеткенін жеткізді. Сол себепті олар күдікті тағы да жауапкершіліктен жалтарып кетуі мүмкін деп алаңдап отыр.

Бұл оқиға қатаң заңнама қажеттілігін тағы бір мәрте көрсетті. Қоғамдық резонанс тудырған қылмыс мемлекет тарапынан ең жоғары деңгейде бақылауға алынып, әйелдер мен балалардың қауіпсіздігін қамтамасыз ету үшін жаңа шаралар қабылдануы мүмкін.