20 жыл комада жатқан Сауд Арабиясының ханзадасы қайтыс болды

Сауд Арабиясының ханзадасы, «ұйқыдағы ханзада» атанған Әл-Уалид ибн Халед ибн Талал Әл Сауд 37 жасында өмірден озды.

Бұл туралы The Siasat Daily басылымы жазды.

Ханзада 2005 жылы Лондонда кадет училищесінде оқып жүрген кезінде жол-көлік апатына ұшырап, ауыр бас-ми жарақатын алған болатын. Содан бері ол 20 жылдан астам уақыт комада жатты.

Оның қайтыс болғаны туралы хабарды әлеуметтік желідегі парақшасында әкесі, ханзада Халед ибн Талал ибн Абдулазиз жария етті.

«Алланың жазғанына және тағдырына иман ете отырып, терең күйзеліс пен қайғымен сүйікті ұлымыз — ханзада Әл-Уалид ибн Халед ибн Талал ибн Абдулазиз Әл Саудтың бұл дүниеден өткенін хабарлаймыз. Алла рақымына алсын», – деп жазды ол.

Басылым атап өткендей, «ұйқыдағы ханзаданың» өмір жолы Сауд Арабиясында ғана емес, бүкіл әлемде көпшіліктің жанашырлығы мен назарын аударған. Ол отбасының үміті мен жақын адам үшін күресінің символына айналды.