2026 жылғы мерекелер: қазақстандықтар қанша күн демалады?

2026 жылы қазақстандықтардың қалай демалатыны белгілі болды. Еңбек және халықты әлеуметтік қорғау министрлігі мерекелік және ауыстырылған демалыс күндері көрсетілген өндірістік күнтізбені жариялады, деп хабарлайды POLITICO.KZ.

Министрлік мәліметінше, келесі жылғы мерекелік күндер тізімі өзгермеген. Бұған дейін 1 маусымды демалыс ету ұсынылғанымен, бұл бастама қабылданбады.

Келесі жылы Қазақстанда Жаңа жыл, 8 наурыз, Наурыз мейрамы, 1 мамыр, 7 мамыр, 9 мамыр, 6 шілде, 30 тамыз және 16 желтоқсан ресми жұмыс істемейтін күндер болып қала береді. 25 қазан Республика күні ұлттық мереке мәртебесінде сақталады. Сондай-ақ 7 қаңтардағы Рождество мен 27 мамырдағы Құрбан айттың бірінші күні де демалыс болып белгіленген.

2026 жылы мерекелердің бір бөлігі демалыс күндеріне сәйкес келгендіктен, бес күндік жұмыс аптасында бірнеше ауыстыру жасалады. 8 наурыз 9 наурызға, 21 наурыз 24 наурызға, 22 наурыз 25 наурызға, 9 мамыр 11 мамырға, 30 тамыз 31 тамызға, ал 25 қазан 26 қазанға ауыстырылады. Алты күндік жұмыс аптасында да сәйкесінше 8 наурыздан 9 наурызға, 22 наурыздан 24 наурызға және 25 қазаннан 26 қазанға өзгерістер енгізіледі.

2026 жылы 7 қаңтар мен 27 мамыр жұмыс күніне түссе де, Рождество мен Құрбан айт ресми демалыс болып саналатындықтан, қазақстандықтар бұл күндері жұмыс істемейді. Осылайша, келер жылғы өндірістік күнтізбе мерекелерге байланысты қосымша демалыстарды қамтып, азаматтарға жеткілікті демалу мүмкіндігін ұсынып отыр.