9 жастағы қыз бакалавр дәрежесін алып, ел тарихындағы ең жас түлек атанды

Францияда 9 жастағы қыз бала бакалавр дәрежесін алып, ел тарихындағы ең жас түлек атанды. Бұл туралы 20 minutes басылымы хабарлады. Ұлттық білім министрлігі оның 2025 жылдың шілдесінде емтихандарды сәтті тапсырғанын растады. Осылайша ол 1989 жылы 11 жас 11 айында мектепті тәмамдаған Артур Рамандрисоаның рекордын жаңартты.

Оқушы математика, физика және химия пәндерінен емтиханды екінші рет тапсырған. Ол Париж маңындағы Клиши қаласында орналасқан ISOSET атты жекеменшік институтта білім алды. Бұл жерде Aleph деп аталатын эксперименттік әдіс қолданылады. Жүйенің негізі – білімді артық жүктемесіз меңгерту, сонымен қатар әр оқушыға бейімделген психологиялық қолдау ортасын құру. Мектеп өкілдері балалардың қарапайым өмір сүріп, қатарластары сияқты дамитынын, тек оқу бағдарламасы жеке жоспар бойынша құрылатынын атап өтті.

Қыздың отбасы аты-жөнін жарияламауды жөн көрген. Белгілі болғаны – ол Францияда туған, Гренада азаматтығына ие және қазір Дубайда оқып жүр. Институт тарапынан айтылғандай, қыздың табысы ерекше туа біткен қабілеттермен емес, қолданылып отырған оқу жүйесімен байланысты.