Адам өлім алдында не көретіні белгілі болды

Ауыр науқастарға күтім жасайтын жақындарына көмек көрсету мақсатында, Италияның Паллиативтік көмек қоғамының мамандары адам өмірінің соңғы сәттерінде не болатынын түсіндіріп берді. Олар өлімге дейінгі негізгі белгілер мен физикалық өзгерістерді атап өтті.

Medscape Medical News басылымына сілтеме жасаған Oxu.Az мәліметінше, өмірден өтер алдында көптеген науқастарда ұқсас белгілер байқалады — бұл өлім себебіне қарамастан ортақ құбылыс.

Ұйқы тәртібінің өзгеруі

Өмірінің соңғы кезеңінде адам бұрынғыдан әлдеқайда көп ұйықтай бастайды. Ұйқы мен сергектік режимі бұзылады: науқас түнгі уақытта ояу болуы мүмкін. Бұл — ағзаның күш жинап, өлімге дайындала бастауының белгісі.

Эмоциялық күйзеліс және түсінік

Науқастар жиі алаңдаушылық пен мазасыздықты сезінеді. Көп жағдайда олар "бұл соңғы күндер" екенін түйсінеді. Кейде адам таныс адамдарын тани алмай қалуы мүмкін, бірақ бұрын қайтыс болған жақындарын "көремін" деп айтады. Мұндай сәттерде ол көріністерге иллюзия ретінде қарамай, керісінше, науқастың ішкі сезімін нәзік түрде сұрастырып, қолдау көрсету маңызды.

Әлемнен алыстау және физикалық өзгерістер

Адамның қоршаған ортамен байланысы үзіліп, ол тамақ пен судан бас тарта бастайды. Өлім алдында дене қызуының жоғарылауы мүмкін — кейбірі салқын су сұрайды. Басқа жағдайларда, керісінше, дене, әсіресе қол-аяқтың салқындауы байқалады.

Тыныс алудың өзгеруі

Өмірден өтер сәтте адамның тынысы таяз және біркелкі емес болады. Науқастардың жартысынан көбінде "шулы, сырылмен тыныс алу" байқалады. Дәрігерлер бұл – табиғи физиологиялық үдеріс екенін, қорықпай, сабыр сақтау керектігін айтады.