Әкесінен таяқ жеген қыздың екі жыл бұрын бауырын ауыстырғаны белгілі болды

Әкесінің соққысынан зардап шеккен кішкентай қыздың жағдайына байланысты «Солнце на ладошке» қайырымдылық қорының басшысы Екатерина Доброва үндеу жасады, деп хабарлайды Politico.kz.

Әңгіме екі жыл бұрын бауырын шұғыл ауыстыру үшін бүкіл ел болып қаражат жиналған Ақжарқын есімді бала туралы. Екатерина Доброваның айтуынша, қыздың әкесі бастапқы кезеңнен-ақ емделу процесіне кедергі келтіріп, отбасына қысым көрсеткен әрі жұбайына күш қолданған.

Түркияда жасалған сәтті операциядан кейін анасы баламен бірге Қазақстанға оралған. Алайда кейін әйел күйеуімен қайта татуласқан, сол уақыттан бастап зорлық-зомбылық әрекеттері қайта жалғасқан.

Қазіргі таңда Ақжарқын ауруханада жатыр. Ол жансақтау бөлімінен жалпы палатаға ауыстырылған.
Қоғам белсенділері бұл іске құқық қорғау органдары қатаң құқықтық баға беріп, баланы әкесінен толықтай оқшаулауды талап етіп отыр.