Актобеде тарих мұғалімі мен тіс технигі есірткі жасап, адам өлтірген

Актобеде тарих пәнінің мұғалімі мен тіс технигі есірткі өндіріп, адам өлтіргені үшін сотталды, деп хабарлайды POLITICO.KZ.

Сот материалдарына сәйкес, олар 2023 жылдың наурызынан бастап 2024 жылдың 13 қаңтарына дейін жалға алынған гаражда мефедрон өндіріп, оны заңсыз сақтап, сатумен айналысқан.

Қылмыскерлер есірткіні сатуға үшінші адамды – Н. есімді тұрғынды тартпақшы болған. Алайда Н. олардың ұсынысынан бас тартқан. Қаңтар айында Н. әкімшілік құқық бұзушылық үшін 20 тәулікке қамалып, есірткі сақтағаны үшін де қылмыстық іс қозғалған.

Тарих пәнінің мұғалімі бұл ақпаратты естіп, олардың байланыстарын білетін Т. есімді танысын өлтіру туралы шешім қабылдаған. Ол тіс технигін қылмысты жүзеге асыруға көндірген.

2024 жылдың 13 қаңтарында қылмыскерлер Т.-ны оқшау жерге апарып, тіс технигі оған бірнеше рет пышақ жарақатын салған. Ер адам оқиға орнында қайтыс болған.

Сот шешімі бойынша, екеуі де кінәлі деп танылып, әрқайсысы 19 жылға бас бостандығынан айырылды. Сонымен қатар, әрқайсысы жәбірленушінің отбасына 10 миллион теңгеден моральдық шығын өтейтін болды.