Әлемге әйгілі Backstreet Boys тобы Астанада ағаш отырғызды

Backstreet Boys әлемдік тобы Астананы көгалдандыруға атсалысты, деп хабарлайды POLITICO.KZ порталы Астана қаласының әкімдігіне сілтеме жасап.

Америкалық танымал Backstreet Boys тобы Астанада өткен сенбілікке қатысып, ағаш отырғызды. Іс-шара жақында ашылған Бейбітшілік пен келісім саябағында «Таза Қазақстан» экологиялық акциясы аясында өтті.

Музыканттар елорда тұрғындарымен бірге қаланы көгалдандыруға өз үлестерін қосты. Бұл бастама достық пен бірліктің нышаны саналатын жаңа саябақтың ашылуымен тұспа-тұс келген.

Бейбітшілік пен келісім саябағы түрлі ұлттар мен конфессиялар арасындағы диалогты нығайтуға арналған бірегей орын.

Ал сенбілік 13 қыркүйек пен 11 қазан аралығында өтетін «Таза Қазақстан. Астана тазалық пен тәртіптің үлгісі» деп аталатын дәстүрлі қалалық айлық аясында ұйымдастырылды.