Алматы әуежайында ер адам қызметкерді пышақпен кепілге алды

Алматы әуежайында ер адам қызметкерді кепілге алып, пышақпен қорқытты. Құқық қорғау органдарының жедел әрекетінің арқасында күдікті ұсталды, деп хабарлайды POLITICO.KZ Kris_p_almaty арнасына сілтеме жасап.

Оқиға бүгін, 7 наурыз күні, Алматы халықаралық әуежайының ішкі рейстер терминалында шамамен 11:45-те орын алған.

Баспасөз қызметінің мәліметінше, ер адам авиациялық қауіпсіздік қызметінің қызметкерін күтпеген жерден шашынан тартып, пышақпен қорқытқан.

"Сағат 11:45 шамасында авиациялық қауіпсіздік қызметінің қызметкерлері ер адамнан құжаттарын көрсетуді сұраған. Осы кезде ол кенеттен тексерушіні шашынан тартып, пышақпен қорқыта бастады. Оқиға орнына дереу полиция қызметкерлері жетіп, жеті минуттың ішінде күдіктіні залалсыздандырды. Қазір ол Алматы әуежайындағы желілік полиция бөлімінде тергеліп жатыр", – деп хабарлады Алматы әуежайының баспасөз қызметі.

Әлеуметтік желілерде оқиғаның бейнежазбасы тарады. Онда ер адамның еденде отырған қызметкердің шашынан ұстап тұрғаны және қолында пышақ бары көрінеді. Куәгерлердің айтуынша, оқиға бірден полиция назарына іліккен, тәртіп сақшылары шұғыл әрекет етіп, ер адамды ұстап үлгерген.

Қазіргі уақытта құқық қорғау органдары оқиғаның мән-жайын анықтап, қылмыстық іс қозғау мәселесін қарастырып жатыр. Алматы әуежайы штаттық режимде жұмысын жалғастыруда.