Алматы облысында бозбала 12 жасар қызға озбырлық жасады деген күдікпен қамауға алынды

Алматы облысының полиция департаменті 12 жасар қызға қатысты зорлық-зомбылық фактісі бойынша қылмыстық іс қозғады. Бұл туралы ақпарат бұған дейін әлеуметтік желіде тараған болатын, деп хабарлайды POLITICO.KZ NUR.KZ-ке сілтеме жасап.

Ведомствоның хабарлауынша, осы іс бойынша күдікті ретінде кәмелетке толмаған жасөспірім ұсталды. Ол алдымен уақытша ұстау изоляторына қамалып, кейін соттың санкциясымен қамауға алынды.

Қазір оқиғаның толық мән-жайын анықтау мақсатында тергеу амалдары жүргізіліп жатыр.

Сонымен қатар, күдіктінің заңды өкілдері баланы тәрбиелеудегі міндеттерін тиісінше орындамағаны үшін әкімшілік жауапкершілікке тартылды.

Облыстық Полиция департаментінің басшылығы тергеу барысын ерекше бақылауға алғанын мәлімдеді.

Кейбір ақпарат арналарының мәліметінше, оқиға Алматы облысының Ынтымақ ауылында болған.