Алматыда сатушы әйел темекі сұраған тұтынушыны соққыға жықты

Алматыда темекі сатып алмақ болған тұтынушы мен сатушы әйелдің арасындағы жанжал төбелеспен аяқталып, нәтижесінде дүкен қызметкері ер адамды соққыға жықты, деп хабарлайды Politico.kz.

Полиция мәліметіне сүйенсек, ер адам дүкенге кіріп темекі сатуды сұраған кезде қызметкер оның жасын нақтылап сұраған, алайда сатып алушы өзінің ересек азамат екенін және бұл оның сырт келбетінен-ақ анық көрініп тұрғанын айтып жауап қатқан. Осыдан кейін екеуара басталған сөз таласы соңында нағыз физикалық қақтығысқа ұласып, сатушы әйел келушіге біршама дене жарақаттарын келтірген.

«Жанжалға қатысушылардың екеуі де Медеу аудандық полиция басқармасына жеткізілді», – деп мәлімдеді Алматы қаласының полиция департаменті.

Қазіргі уақытта таяқ жеген азамат дүкен қызметкерінің үстінен арыз жазуға ниетті екенін жеткізді, ал тәртіп сақшылары оқиғаның толық мән-жайы мен әрбір қатысушының жауапкершілік деңгейін анықтау үшін тиісті тексеріс жұмыстарын жүргізіп жатыр.