Ақ үй алдында қарулы қақтығыс орын алды

Вашингтондағы Ақ үй маңында атыс болып, АҚШ-тың Құпия қызметі қарулы ер адамға оқ атты, деп хабарлайды POLITICO.KZ BBC деректеріне сүйене отырып.

Мәліметтерге сәйкес, жергілікті полиция Индиана штатынан Вашингтонға қарай бет алған, суицидтік ойы бар адам туралы хабар алған. Құпия қызмет қызметкерлері Ақ үй маңында күдікті ер адамды байқаған, бірақ ол қаруын кезене бастағанда, құқық қорғау органдары оны оқпен тоқтатуға мәжбүр болған.

"Құпия қызмет қызметкерлері күдіктіге жақындағанда, ол қаруын суырып алды. Осыдан кейін атыс басталды, біздің қызметкерлер қарулы адамға қарсы оқ атты", – делінген Құпия қызметтің ресми хабарламасында.

Қарулы ер адам ауыр жараланып, қазіргі уақытта ауруханада жатыр. Оның жағдайы туралы ақпарат жарияланған жоқ.

Оқиға кезінде АҚШ президенті Дональд Трамп Ақ үйде болмаған. Ол әдетте демалыс күндерін Флоридадағы Мар-а-Лаго резиденциясында өткізеді.

Қазіргі таңда Вашингтон полициясы оқиғаның мән-жайын зерттеуде.