Ақтөбедегі кепілге алу оқиғасының мән-жайы белгілі болды

13 қаңтарда сағат 20:00 шамасында Ақтөбеде жеке тұрғын үйде әйелді кепілге алғаны туралы ақпарат түсті, деп хабарлайды POLITICO.KZ.

Ақтөбе облысы полиция департаментінің мәліметінше, кепілге алынған әйел күдіктімен бұрын таныс болған. Қылмыскер ешқандай талап қоймаған. Үш сағатқа созылған келіссөздер нәтижесіз аяқталғандықтан, арнайы операция жүргізіліп, штурм жасау туралы шешім қабылданды.

«Арнайы операция нәтижесінде күдікті ұсталып, кепілге алынған әйел босатылды. Оқиға орнын тексеру кезінде жертөледе әйелдің егде жастағы ата-аналары пышақ жарақаттарымен табылды», – делінген полиция хабарламасында.

Қылмыстық іс қозғалып, күдікті уақытша ұстау изоляторына қамалды.