Әшекей сатып басы дауға қалған Ерке Есмахан ақталды

Басы дауға қалған әнші Ерке Есмахан өзінен 50 мың теңгеге сотуар сатып алған оқырмандарына жауап берді.

"Ерке Сотуар" менің идеям! Менің жүрегімнен шыққан туынды. Сіздерге менің ақ тілегім, оған күмән болмасын. Бірақ сапасы жағы көңілімді түсірді. Өзім шокта болдым. Кей сотуарлар өңін өзгертіп жатыр екен. Неше күннен бері командамен мұның себебін зерттеп жатырмыз.

Шебер бұл жерде екі себебі бар дейді: біріншісі, 100% қолдан шыққан бұйым болғандықтан, кейбіреулерінде ақау бар деп мойындап тұр. Екіншісі, күміске алтын жалатылғандықтан, тағушының денсаулығында ақау болса, бұйым өңін өзгертеді дейді. Күміс - емдік металл. Мұны да естен шығармайық", - деп әшекейдің қарайып кетуінің себебін түсіндірді әнші.

Алайда өнер иесі ақауы бар әшекейдің мәселесін шешіп беретінін айтты.

"Осының бәрін дұрыстап қадағаламаған менің және командамның кінәсі. Қазақ шеберлері барлық бұйымды мінсіз жасап беретініне сендім, бірақ made in Kazakhstan, енді қайтемін, ондай болады біздің елде. Кемшілік іздеп, оны тауып, қуанып жариялап жатқандарға ештеңе айта алмаймын. Жақсы атқа да, жаман атқа да қалатын өзім-ай, өзім.

Енді айтарым, қыздарым! Егер сотуар қарайып, өзгеріп жатса, командаға хабарласыңыздар, проблеманы шешіп береді. Еш уайымдамаңыздар. Мені таба алмай қалмайсыздар, алдарыңызда жүрмін. Қазақстанға қайтып келемін. Сондықтан бірнеше ақау сотуар үшін еңбегімізді, сіздерге деген тілегімізді жоққа шығармаңыздар", - деді Ерке Есмахан.

Еске салайық, танымал әнші Ерке Есмахан Жаңа жылға дейін 50 мың теңгеге өзі ойлап тапқан сотуарды сатылымға шығарған болатын. Әлеуметтік желіде оның сапасына қатысты дау шықты.

Ерке Есмахан сотуар алтын жалатылғанын, бірақ ішінде күміс екенін айтқан еді. Әлеуметтік желіде 50 мың теңгелік сотуардың бірден қарайып кеткенін жазып, адамдар шағымданып жатыр.