Астанада автобус пойызбен соқтығысты

Астанада Лесозавод ауданындағы теміржол өткелінде маршруттық автобус пойызбен соқтығысты, деп хабарлайды Politico.kz.

Әлеуметтік желілерде апат орнынан видео тарады. 

Желі қолданушылары апаттың  Лесозавод ауданындағы «Вагонозавод» автобус аялдамасының жанында болғанын атап өтті.

Астаналық полицияның мәліметінше, 20 маусымда «Ивеко» маршруттық автобусының жүргізушісі Тайбурыл көшесіндегі теміржол өткелінен өтіп бара жатып, келе жатқан локомотивке жол бермеген.

«Соққы салдарынан маршруттық автобус инерциямен Hyundai автокөлігіне соғылды. Жол-көлік оқиғасынан зардап шеккендер жоқ. Аталған факт бойынша автобус жүргізушісі әкімшілік жауапкершілікке тартылды», - делінген хабарламада.

Іс Әкімшілік құқық бұзушылық туралы кодекстің 607-бабының 3-бөлігі («Теміржол өткелдерінен өту қағидаларын бұзу») бойынша тіркелді.