Атырау тұрғындары тағы да «тұншығып» жатыр: Экология министрлігі негізгі себептерді атады

Атырау тұрғындары тағы да жағымсыз иіске шағымданып, ауа сапасына алаңдаулы, деп хабарлайды Politico.kz.

Қалада күкіртсутектің жоғары концентрациясы бірнеше факторға байланысты екені айтылды.

Қазақстан Экология министрлігінің мәліметінше, Атыраудағы ауа ластануының негізгі көздеріне Атырау мұнай өңдеу зауыты, «Атырау облысы Су Арнасы» коммуналдық кәсіпорнының кәріз нысандары және «Квадрат» буландыру алаңы жатады. Сонымен қатар, жылыту қазандықтары мен жылу электр орталығы да атмосфераға әсер ететін факторлардың қатарында.

Ведомство мәліметінше, жағдайды желдің әлсіз болуы, түнгі уақыт және зиянды заттардың ауада баяу таралуы сияқты қолайсыз метеорологиялық жағдайлар күрделендіреді.

Қыркүйектің алғашқы жартысында Атыраудағы мониторинг бекеттері ауа құрамында зиянды заттардың жоғары концентрациясын тіркеген. Мәселен, 7 қыркүйекте Жилгородок ауданында күкіртсутек мөлшері 96,7 мкг/м³-ке жеткен. Рұқсат етілген шекті деңгей 8 мкг/м³ болған. Ал Ақ Шағала шағынауданында көрсеткіш 24,6 мкг/м³-ті құраған.

14 қыркүйекке қараған түні қала тұрғындары тағы да өткір иіске шағымданды. Олардың айтуынша, жағымсыз иіс жабық терезелердің өзінен сезілген.

Тұрғындардың шағымынан кейін Атырау облысының экология департаменті жоспардан тыс тексеру бастаған. Алайда оның нақты нәтижелері әзірге жарияланған жоқ.

Министрлік ауа сапасын жақсарту үшін шығарындыларды азайту, инфрақұрылымды жаңарту және экологиялық бақылауды күшейту жұмыстары жүргізіліп жатқанын хабарлады. Бірқатар ірі кәсіпорындарда автоматтандырылған мониторинг жүйелері орнатылып, олардың деректері ұлттық базаға жіберіледі.